Wie bi allnä gaht au a mir dä Lauf vo dä Ziit nöd spurlos verbi. Ich wirde älter, mag nüme jedem Sturm so eifach standhalte und bruche öfters äs extra Öfeli zum mich warm halte. Alles isch langsam echli iigroschtet und verchalchet und es wird Ziit dä neue Generation Platz z’mache.

I mim Alter chan ich mit dä vielä neue Aforderige au nüme würklich mithalte und hoffe, dass ich die schwäre Laschtä bald nüme muess sälber träge.

Ich ha das die letschte fascht 40 Jahr würklich sehr, sehr gern gmacht und mich riisig über all die Gottesdienscht, die tollä Fäschter, spielende Chind, die berüehrendi Musik oder lehrriche Stunde gfreut. Ich fühle mich geehrt, die und au di schwirigä Moment mit eu erläbt zha. Aber jetzt wird’s Ziit für mich, mich z’verabschide.

So eifach lönd mich aber die jetzige Tikianerinne und Tikianer nöd gaa….

Sie sammled für mich, oder besser gseit für mini Nachfolg. Erscht wänn sie 400'000 Franke zäme händ, lönds mich i min, wie ich finde, lang verdiente Ruhestand. Okay dä eint oder ander wür vermuetlich säge - Früehpensionierig, aber das isch Aasichtssach. Wortwörtlich - wämmer nöd so genau lueget - gsehn ich natürlich no sehr guet us.

Dini Tiki